الرئيسية

نسمع كثيراً أو نرى فى بعض الأحيان إعلانات عن الربح من الإنترنت ، العمل من المنزل ، الإنترنت بيجيب فلوس ، كيف تعمل من منزلك ، أعمل كذا وخد فلوس، طرق الربح المجربة، الشركات الصادقة للربح من الإنترنت ، أكسب من الإنترنت .... 
وهكذا ..... يا ترى فى فعلاً أرباح ممكن تحقيقها من الإنترنت ولا لأ ... طب إزاى .

برحب بكل الزوار والأصدقاء المصريين بشكل خاص والعرب بشكل عام ، فى الموقع ده وأسمحولى اسميه موقع بلفظ مجازى يعنى .. فى البداية حابب أوضح شوية خطوط عريضة لكل اللى بيقرا الكلمتين دول ... الهدف من الموقع ده مش إزاى تكسب فلوس من الإنترنت وبس لأ الهدف منه التفكير فى إستخدام التكنولوجيا اللى ربنا بيكتبلنا نوصلها يوم بعد يوم إستخدمات حسنة وتعود علينا بخير إن شاء الله.

هنتكلم فى الموقع بشكل عام ومتخصص حسب الموضوع اللى بنتكلم فيه وحسب ظروف الشرح وقتها وإحتياجات التوضيح للمفاهيم المختلفة وكمان يمكن نستشهد ببعض الآراء والشروحات للسادة اللى أتفضلوا واتكلموا فى الموضوعات دى فى فيديوهات أو مواقع أو مقالات سابقة أو عبروا عنها حتى بمجموعة صور وكلمات مختصرة.

أستأذنكوا فى إننا نكون مرنين سوا ونتعامل بشكل راقى فى التعليم والتوضيح وحتى عند الإعتراض وإرسال التعليقات أو الملاحظات المختلفة ، وده طبعاً من منطلق إن الكمال لـله عز وجل وحده ... وإننا كبشر ليس بيننا كامل ولا يوجد منا من له فضل على غيره إلا بالتقوى والعمل الصالح . 

وإستكمالاً للبداية يمكن تلاقى فى بعض الأحيان أنى بقول كلام حضرتك كزائر عارفه ... جميل أوى ... قدامك عدة خيارات .. ممكن تعدى الموضوع ده لو عايز أو تقفل الصفحة خالص أو لو هتشوفه وليك ملاحظات تعلق عليها أو تشوفه لو حاسس إنه يمكن يضيف أو ...... إلى أخره.

سـ/ إحنا هنتكلم فى أيه ...؟

جـ/ هنتكلم فى موضوعات كتيرة (مفاهيم عامة ، مفاهيم خاصة ، أدسنس ، أفلييات ، صفحات هبوط ، ويب تو ، قائمة بريد إلكترونى ، أنواع البريد الإلكترونى ، إزاى نستخدم كل نوع وأيه إمكانياته وخصائصه ، يعنى ايه صور وإزاى نتحكم فيها وفى حجمها وتأثيرتها ، يعنى أيه كلام مكتوب وإزاى نتحكم فيه وفى إتجاهه ونعمل عليه تأثيرات حجم ونوع خط ، إزاى نستخدم برامج الأوفيس والويندوز بسهولة ومرونة ، يعنى أيه فيديو وإزاى نقدر نعمل فيديو بإستخدام الصوت والصورة وبرامج بسيطة ومتاحة بسهولة ، إزاى نعمل صفحات مجانية أو صفحات أو مواقع مدفوعة الأجر ، أيه الفرق بين الصفحة المجانية واللى مدفوع فيها فلوس ، إزاى نستفيد من كل البرامج اللى بنشتغل بيها بسهولة ونستغل إمكانيات شبكة الإنترنت فى الترويج لمنتج أو بيعه أو عمل حملات تسويق وإشهار ، يعنى أيه سيو ، إزاى نعمل سيو بشكل بسيط ، إزاى نوصل فى النهاية لعائد مادى ، حجم العائد ده أد أيه وبيتوقف على ايه ........... وموضوعات تانية كتيرة خالص لدرجة إننا مش هنقدر نحصرها كده فى كلمتين).

Ad-sense / Web 2 / Ad-word/ Advertising / Design / Coding / Blog / Web Site /  Landing Page / Affiliate / product / M.S.Word / Keyword / M.S.Excel / M.S.Power Point / Paint / Photo shop / Domain / Hosting / and more......